Þann 10. nóvember 2025 beindi nýi umhverfisgervihnötturinn NISAR sjónum sínum að hinu fræga St. Helens-eldfjalli í Washington-fylki í Bandaríkjunum. Þótt dagurinn hafi verið skýjaður skipti það engu máli fyrir gervihnöttinn. Hann er nefnilega búinn afar öflugri ratsjá sem skýtur geislum sínum leikandi létt í gegnum skýjaþykknið og skannar yfirborð jarðar af mikilli nákvæmni.
Ratsjármyndin sem gervihnötturinn sendi til jarðar er einkar litrík, en litirnir segja vísindamönnum mikilvæga sögu um samsetningu landslagsins. Gulgræn svæði sýna gróðurlendi á borð við skóga og votlendi, á meðan slétt yfirborð eins og vötn eða gróðurlaus svæði á sjálfu fjallinu birtast í dökkbláum lit. Þá má sjá bleikrauða bletti sem endurkasta ratsjárgeislanum sterkt, en þar eru á ferðinni manngerðir fletir eins og vegir og byggingar. Við rætur fjallsins má jafnvel greina fjólubláa ferninga sem líklega eru merki um skógarhögg eða nýræktun skóga.
NISAR-verkefnið er stórtækt samstarf bandarísku geimferðastofnunarinnar (NASA) og þeirrar indversku (ISRO). Gervihnettinum var skotið á loft í júlí 2025 og mun hann vakta landmassa og íshellur jarðarinnar tvisvar á hverjum tólf dögum. Til að safna þessum gríðarmiklu gögnum notar gervihnötturinn 12 metra breitt endurvarpsloftnet, sem er hið stærsta sinnar tegundar sem NASA hefur nokkurn tíma sent út í geim.